Австралиядаги UFC турнирининг асосий жангида кутилмаган натижа

Оқшомнинг асосий жанги ярим ўрта вазн тоифасида ўтказилиб, унда дивизион рейтингида бешинчи ўринни эгаллаб турган бразилиялик Карлос Пратес собиқ чемпиони австралиялик Жек Делла Маддаленага қарши октагонга чиқди. 

Жанг бироз кутилмаган натижа билан якунига етди. Учинчи раундда Пратес номдор мезбон рақибни ўз ватандошлари кўз ўнгида техник нокаутга учратди. Бу Жек учун кетма-кет қабул қилиб олган иккинчи мағлубият бўлди. Карлос эса аксинча, ғалабали сериясини учта жангга етказиб олди. 

Маълумот учун, 29 ёшли Жек Маддалена профессионал ММАдаги фаолияти давомида 18 ғалаба (14 таси муддатидан олдин) 4 та мағлубият қайд этган. Делла Маддаленанинг дебюти 2016 йилнинг март ойида бўлиб ўтган. 32 ёшли Карлос 2012 йилда ўз дебютини нишонлаган. Унинг ММАдаги рекорди 24 ғалаба (22 таси муддатидан аввал) ва 7 та мағлубиятдан иборат.