Аёллар ўртасидаги блиц жаҳон чемпионатида ҳам чемпион аниқланди

Жаҳон чемпионатининг блиц, яъни тезкор шахмат баҳсларида тарихий ҳолат қайд этилгани ҳақида хабар берган эдик. Тарихда илк бор эркаклар ўртасидаги мусобақада икки чемпион бўлди. Блиц баҳсларининг финалида норвегиялик Магнус Карлсен ҳамда FIDE байроғи остида ўйнаган россиялик Ян Непомняший ўзаро тўқнаш келишди. 

Дастлабки икки партияда Магнус ғалаба қозонди. Кейин Ян икки ғалаба эвазига мувозанатни тиклади - 2:2. Кейинги учта партияда кучлар тенг келди. Шунда Магнус Янга қўшчемпионликни таклиф қилди. Непомняший эса уни қабул қилди. Шу кунгача тарихда бундай ҳолат кузатилмаган эди. FIDE Магнус Карлсен учун ишлаётганга ўхшаб қоляпти. 

Аёллар ўртасидаги блиц баҳсларида эса хитойлик Цзюй Вэньцзюнь 2024 йилги жаҳон чемпиони бўлди. У финалда ҳамюрти Лэй Тинцзени мағлубиятга учратди — 3,5:2,5. Жаҳон чемпионатининг бронза медаллари россиялик Екатерина Лагно ҳамда ҳиндистонлик Рамешбабу Вайшалига насиб этди.