Баҳодир Жалолов: "Насиб қилса, оғир вазн тоифасидаги чемпионлик камари бир кун келиб меники бўлади"

Биз ушбу ғалабадан сўнг боксчимиз билан боғланиб, унинг фикрлари билан қизиқдик.

«Жанг жуда яхши ўтди. Рақибим мексикалик тажрибали чарм қўлқоп устаси эди. Беллашув учун тактика ишлаб чиқдик ва ғалаба қозона олдик. Ушбу ютуқни юртдошларимга бағишлайман. Чунки, халқимни дуоси билан мана шу муваффақиятга эришдим.

Бизга шароит яратиб бераётган Миллий олимпия қўмитасига миннатдорчилик билдирмоқчиман. Эътибор учун раҳмат айтаман. Кейинги жангимни июнь ойида ташкил қиламиз. Рақиб ҳозирча номаълум.

Олдимга қўйган мақсадим катта. Насиб қилса 2020 йилда Токиода ўтадиган Олимпия ўйинларида иштирок этаман. У ерда олтин медални қўлга киритишим керак. Чунки, ватанимдан олтин медаль қарзим бор. Насиб қилса Олимпия ўйинлари чемпиони бўламан.

Ва албатта профессионал боксда ҳам чемпионлик камарини қўлга киритиб, Ўзбекистонни янада дунёга танитаман. Оғир вазн тоифасидаги чемпионлик камари насиб қилса бир кун келиб менда бўлади», – деди Баҳодир Жалолов Миллий олимпия қўмитаси матбуот хизматига берган интервьюсида.