Баҳодир Жалолов шу йил проф боксда иккита жанг қилмоқчи

Бу ҳақида боксчимиз Olamsport.com сайти мухбири билан суҳбатда айтиб ўтди. 

"Айни пайтда АҚШга кириш ҳуқуқини берувчи визам тугаган. Шу сабабли океанортига кета олмаяпман. Сентябрдан бошлаб элчихона яна очилади ва насиб қилса виза олиб, АҚШга кетаман. 

Худо хоҳласа шу йилнинг охиригача иккита жанг ўтказмоқчиман. Жошуа, Фьюри, Уайлдер каби боксчилар жанг қиладиган оқшом кардида рингга кўтарилишни режалаштиряпман", - деди Баҳодир Жалолов. 

Эслатиб ўтамиз, Жалолов шу йили март ойида Амманда ўтказилган лицензион мусобақада Токио Олимпиадасига йўлланма олган. 

Айни пайтга келиб, пандемия сабаб бокс мусобақалари ўтказилиш жараёни тўхтаган. Биздаги маълумотларга кўра, боксчимиз айни пайтда жанг амалиёти зарур бўлгани сабаб ўзини проф рингда синаб кўришни маъқул топган.