Баҳрайнлик аралаш яккакураш устаси UFC турнирнинг асосий жангида октагонга кўтарилади

Эътиборлиси, UFC Fight Night 238 оқшомининг асосий жангида асли келиб чиқиши доғистонлик бўлган, ҳозирда Баҳрайн давлати шарафини ҳимоя қилаётган Шамиль Газиев  хедлайнер мақомида октагонга чиқади. Оғир вазн тоифасида жангларини ўтказиб келаётган Газиев суринамлик нокаутчи Жаирзиньо Розенстрайк билан ўзаро тўқнаш келади.

Шамиль ўзининг UFC октагонидаги иккинчи жангидаёқ шундай имкониятга эга бўлмоқда. Аслида UFC Fight Night 238 турнири Саудия Арабистони пойтахти Ар-Риёд шаҳрида ўтказилиши керак эди. Аммо промоушен раҳбарлари Саудиядаги турнирни ёз фаслига кўчиришга қарор қилишди. 

Маълумот учун, мағлубият нималигини билмай келаётган 33 ёшли Шамиль Газиев ўтган йилнинг декабрь ойида UFC промоушенидаги дебют жангини ўтказганди. Лас-Вегасда ўтган UFC 296 турнирида у Мартин Будаяни иккинчи раундда техник нокаутга учратган эди.

Суринамлик 35 ёшли Жаирзиньо Розенстрайк эса сўнгги жангларида омадсизликка учрамоқда. У охирги 8 та жангидан 5 тасида мағлубият аламини тотиб кўрди. "Биги Бой" ўтган йилнинг май ойида Жаилтон Алмейдага ютқазиб қўйганди. Жаилтон рақибини биринчи раунддаёқ бўғиб қўйган эди. 

Айни пайтда Жаирзиньо Розенстрайк UFC оғир вазнлилар рейтингида 12-ўринни эгалаб турибди. Шамиль Газиев эса ҳали дивизионнинг Топ-15 жангчилари сафига кирмаган.