"Барча қоидани тўғри тушуниб, вазиятни тўғирлади. Магнус Карлсен эса..." - ФИДЕ президенти ЖЧда рўй берган ҳолат ҳақида гапирди

Нью-Йоркдаги жаҳон чемпионати вақтида норвегиялик гроссмейстер дресс-код, яъни кийиниш қоидаларига риоя қилмагани учун огоҳлантирилди ва 200 доллар жаримага тортилди. Шундан кейин, ундан джинси шимни алмаштириб олишни сўрашди. 

Карлсен эса буни истамади ва мусобақада қатнашмаслигини маълум қилди. 

Аркадий Дворкович бу ҳақида шундай деди: 

"Биз барча иштирокчиларга қоидалар борасида адолатли бўлишимиз керак. Ўша кунги ўйинлар вақтида бош ҳакам бошқа ўйинчиларга ҳам шундай огоҳлантириш берган, улар орасида камида икки нафар топ-шахматчи ҳам бор эди. Қолган ўйинчилар қоидаларни ҳурмат қилган ҳолда, вазиятни тўғирлашди. Магнус эса принципиал тарзда буни қилишни истамади. Агар биз қоидаларни барчага бирдек татбиқ этишни истасак, бош ҳакам қарори - ягона тўғри қарор эди. 

Бундай бўлишини истамагандим. Бетоблигим сабабли ушбу мусобақага бора олмадим. Балки ўша ерда бўлиб, бевосита мулоқотга киришганимда, вазиятни ўзгартирган бўлардим", - деди Дворкович.