Bellator 276. Рабадановда ғалаба ва бошқа натижалар + ФОТОГАЛЕРЕЯ

Bellator 276 оқшоми доирасида бир-биридан қизиқарли жанглар бўлиб ўтди. Россиялик 29 ёшли ММА устаси Гаджи Рабаданов Янги Зеландия вакили Жей Жей Уилсонни уч раундлик жанг якунида очколар ҳисобига кўра мағлубиятга учратди.

Рабадановнинг бурчагида Хабиб Нурмагомедовнинг мураббийи Хавьер Мендес ҳамда енгил вазн тоифаси вакили Ислам Махачевни кўриш мумкин эди.  

Оқшомнинг марказий жангида эса венгриялик Адам Борич даниялик Мадс Бернеллга қарши октагонга кўтарилди. Беш раунд тўлиқ давом этган жанг якунида Борич очколар ҳисобига кўра ғалаба қозониб, ярим енгил вазн тоифасида Bellator чемпионлик камари учун расмий даъвогарга айланди.  

Кечанинг ко-мэйнивент жангида ярим оғир вазнда собиқ Bellator чемпиони Фил Дэвис Жулиус Энгликасдан очколар ҳисобида устун келди. Бу унинг лигадаги кетма-кет иккинчи ғалабаси бўлди. 

Бугунги оқшомда россиялик ММА гўзали Диана Авсарагова ҳам ўз жангини ўтказди. 23 ёшли Авсагарова америкалик Кира Батарани 30-27, 30-27, 30-27 ҳисобида мағлубиятга учратди.

Шунингдек, бугун Алекс Полиззи, Ромеро Коттон, Коди Лоу, Роман Фаралдо, Жордан Говард ва Нико Алькараз рақибларини муддатидан аввал мағлуб этиб, навбатдаги ғалабаларини тантана қилишди.