Бешта турнирдан иборат Freestyle Chess Grand Slam`нинг дастлабкисида кутилмаган чемпион!

Мусобақада дунёнинг рейтинги баланд 10 нафар гроссмейстери бош соврин учун баҳс олиб борди. Улар орасида 19 ва 20 ёшли гроссмейстерларимиз Жавоҳир Синдаров ҳамда Нодирбек Абдусатторовлар ҳам кучли рақибларига қарши муносиб қаршилик кўрсатишди. 

Жавоҳир Нодирбекдан фарқли равишда турнир стартига жуда оз қолганда мусобақага қўшилди. У ҳиндистонлик афсонавий шахматчи Вишванатан Ананднинг ўрнини эгаллади. Айнан Синдаров ушбу турнирга саралаш вазифасини ўтаб берган мусобақа финалига қадар етиб келгани учун ташкилотчилар айнан уни Германияга таклиф қилишди. Ўша саралаш турнири финалида Синдаровни таслим этган Владимир Федосеев Freestyle Chess Grand Slam`ни охирги ўринда якунлади. 

Кеча учинчи ўрин учун кечган учрашувда Жавоҳир Синдаров норвегиялик афсона Магнус Карлсенга имкониятни бой бериб қўйди. Албатта, бу баҳсда Жавоҳирдаги чарчоқ аломатлари ҳам сезилиб қолди. У бир кун аввал 1/2 финалда дунё рейтингида иккинчи ўринни эгаллаб турган америкалик Фабиано Каруана билан 7 партиядан иборат 6 соатдан ошиқ давом этган жуда қийин матч ўтказганди. Бу финалда ўйнаган Каруанага ҳам таъсир ўтказганди. 

20 ёшли Нодирбек Абдусатторов эса 5-ўрин учун ўтказилган матчда дунё рейтингида учинчи ўриндан жой олган америкалик 37 яшар Ҳикару Накамурага имкониятни бой бериб қўйди. 

Шу тариқа, Жавоҳир Синдаров Freestyle Chess Grand Slam турниридаги иштирокини 4-ўрин ҳамда 60 000 АҚШ доллари миқдоридаги пул мукофоти билан якунлади. Нодирбек Абдусатторов 40 000 долларга эга бўлди. Магнус Карлсен 3-ўрин билан бирга 100 000 долларига бойиди. 

Мусобақанинг ҳал қилувчи финал учрашувида америкалик Фабиано Каруана турнир кашфиётига айланган германиялик 20 ёшли Винсент Кеймерга 0,5:1,5 ҳисобида ютқазиб қўйди. Кеймер ўз ватанидаги мусобақада чемпион бўлиш баробарида 200 000 АҚШ доллари миқдоридаги пул мукофотини қўлга киритди. Каруана эса 140 000 долларга эга чиқди.

Мукофот пулларининг тақсимоти: 

Чемпион - 200 000 АҚШ доллари

2-ўрин - 140 000 

3-ўрин - 100 000 

4-ўрин - 60 000 

5-ўрин - 50 000

6-ўрин - 40 000 

7-ўрин - 30 000 

8-ўрин - 20 000 

9-ўрин: 12 500 

10-ўрин: 7 500.