"Бейбарис" - "Ҳумо" учрашуви тақдирини ягона шайба ҳал қилди

Тошкентнинг "Ҳумо" клуби кетма-кет 4 та ғалабадан кейин аутсайдерлардан бири майдонида мағлубиятга учради. "Қанотлилар" Атирауда "Бейбарис" клуби меҳмони бўлиб, 0:1 ҳисобида имкониятни бой бериб қўйишди. Ягона шайба учинчи бўлимнинг биринчи дақиқасида Илья Ковзалов томонидан киритилди. 

Шубҳасиз, ўйин қаҳрамони мезбонлар дарвозабони Артём Микушин бўлди. У 46 та зарбани қайтаришга муваффақ бўлиб, ўз дарвозасини дахлсиз сақлаб қолди. Бугун жамоалар ўртасидаги иккинчи учрашув бўлиб ўтади. 

"Ҳумо" кечаги мағлубиятдан кейин 39 очко билан 2-ўриндан 3-поғонага пастлади. Шунча очкога эга, лекин "Ҳумо"дан 4 та учрашув кам ўтказган "Арлан" клуби 2-ўринни эгаллаб турибди. Пешқадам "Торпедо" 42 очко билан карвонбошиликни давом эттирмоқда. "Бейбарис" кечаги ғалабадан кейин очколарини 17 тага етказиб, турнир жадвалида 10-поғонадан жой олган.