Биринчи ярим ўрта вазн тоифасида WBC чемпионида допинг аниқланди

Боксчининг таҳлилларида тақиқланган остарин моддасини излари аниқланган. Бу дори воситаси одатда мушак массасининг ўсишини рағбатлантириш ва чидамлиликни ошириш учун ишлатилади.

Матиас Б намунасини очишни талаб қилиш ҳуқуқига эга. Айни ҳолатда унинг 10 январь куни Далтон Смит билан бўлиб ўтадиган чемпионлик камари ҳимоя жанги барбод бўлиш арафасида турибди. Чемпион дисквалификация қилиниши мумкин.

Маълумот учун, 33 ёшли Сабриэл Матиас ўз вазн тоифасидаги нокаутчилардан бири ҳисобланади. Профессионал рингда у 23 та ғалаба (22 та муддатидан олдин) ва иккита мағлубият қайд этган. У айни пайтда биринчи ярим ўрта вазн тоифасида WBC чемпиони бўлиб турибди. Айнан Матиас ҳамюртимиз Шоҳжаҳон Эргашевга чемпионлик жангида фаолиятидаги илк мағлубиятни тақдим этган эди.