Бивол қайси ўзбек боксчилари билан спарринг жанг ўтказиши маълум қилинди

Хабарингиз бор, кеча тунда жаҳон бокс юлдузларидан бири Дмитрий Бивол машғулот ўташ учун юртимизга келди. Уни аэропортда таиқли боксчиларимиз, мураббийларимиз ва ОАВ ходимлари кутиб олди. Оlamsport.com сайти муҳбири фурсатдан фойдаланиб терма жамоамиз мураббийи Тўлқин Қиличевга бир нечта савол билан юзланди:

«Жаҳон бокси юлдузларидан бири Дмитрий Бивол айнан Ўзбекистонга машғулот ўташ учун келишига сабаби - бизни охирги вақтларда кўрсатаётган натижаларимиз деб ўйлайман. Яхши натижалар барибир чемпионларни чорлайди. Уларда ҳам савол туғиладида, нимага улар чемпион бўляпти, қани биз ҳам бир кўрайликчи деган фикр уйғонади. Ошни кучигами, қазини кучигами ёки меҳмондўстлигимизгами? Қизиқиб кўради бошқалар ҳам. Шу мақсадда уларнинг ўзларида ҳам бизнинг йигитлар билан биргаликда йиғин ўтказиш учун хоҳиш бўлди. Улар федерациямизга чиқишди, федерациямиз вакиллари бу таклифни мамнуният билан қабул қилишди. Бу биз учун ҳам катта мотивация. 

Ҳозирги вақтда Биволнинг Канело билан жанг қилиши ҳақида музокаралар кетяпти. Бу жангнинг қандай катта масштабдалигини гонораридан ҳам билса бўлади. Бивол каби юлдузларнинг жамоасини кўриб бизнинг ёш шогирдларимизда ҳам чемпионлик руҳи янада ортишига ишонаман. Бизга бу жудда катта фойда. Биз булар хурсанд бўлиб кетиши ва яна бошқа чемпионлар келиши учун йиғинимизни аъло даражада ўтказишга ҳаракат қиламиз. Улар ҳам юртимизда машғулот қилиб чемпионликни қўлга киритса, айтади кейин - Ўзбекистонда тайёргарлик кўриб чемпион бўлдим, деб. Мана ҳозир йиғиннинг биринчи босқичини шу ерда қилади, агар ёқса иккинчи-учинчи босқичларини ҳам Ўзбекистонда қилар, балки.

Бивол билан албатта бизнинг боксчилар ўртасида спарринглар бўлади. Биз Рўзметов, Аслонов, Мержанов каби боксчиларимизни таклиф қиламиз», - деди Қиличев.