Блиц бўйича жаҳон чемпионати. Омонова шов-шув кўтарди, Абдусатторов Топ-10`таликда! (ФОТО+ЖАДВАЛ)

Ушбу нуфузли мусобақада дунёнинг 70 давлати вакиллари орасида Ўзбекистон терма жамоасининг 15 нафар шахматчиси ҳам иштирок этмоқда. Рапид баҳсларида совринли ўринларсиз қолган ҳамюртларимиз бор эътиборларини блиц, яъни тезкор шахмат мусобақасига қаратишган. 

Кеча блиц бўйича жаҳон чемпионатининг биринчи куни аёллар 10, эркаклар 13 та турда ўзаро муносабатларига ойдинлик киритиб олишди. Аёл шахматчилар мусобақасида Умида Омонова яхшигина шов-шув кўтарди. Ҳамюртимиз кетма-кет 6 та учрашувда ғалаба қозонди. У кечаги 8 та ғалабаси эвазига 10 имкониятдан 8 очко жамғарди ва қўшимча кўрсаткичларга кўра 3-ўринни эгаллаб турибди. Иккинчи поғонадаги россиялик Александра Горячкина ҳисобида ҳам 8 очко бор. Нидерландиялик Элин Ройберс 8,5 очко билан якка пешқадамлик қилмоқда. Бугун 11-турда Умида Омонова айнан Ройберсга қарши баҳс олиб боради.   

Эркаклар ўртасидаги баҳсларда кеча 13 та тур ўтказилди. Ҳозирча энг яхши натижамиз Нодирбек Абдусатторовда, у 9 очко билан 10-ўринни банд этган. Кеча Жавоҳир Синдаровга қарши кечган ўзбек дербисида кучлар тенг келди. Жавоҳир 8,5 очко билан қўшимча коэфицентларга кўра 25-поғонада бормоқда. 

Ҳиндистонлик Аржун Эргаиси, француз Максим Вашье-Лаграв ва америкалик Фабиано Каруана 10 тадан очко жамғариб, Топ-3`таликдан жой олган. Россиялик Даниил Дубов, хитойликлар Лу Шанглей, Ю Янгйи, грузиялик Баадур Жобава, америкалик Уэсли Со ва россиялик Александр Гришук 9,5 тадан очкога эга.   

Шахматчилариимизнинг Блиц баҳслари 1-кунидан кейинги ўринлари:

Эркаклар:

1. Нодирбек Абдусатторов – 9 очко, 10-ўрин

2. Жавоҳир Синдаров – 8,5 очко, 25-ўрин

3. Нодирбек Якуббоев – 7,5 очко, 80-ўрин

4. Муҳиддин Мадаминов – 7 очко, 98-ўрин

5. Шамсиддин Воҳидов – 6,5 очко, 121-ўрин

6. Муҳаммадзоҳид Суяров – 6 очко, 152-ўрин

7. Исломбек Синдаров – 5,5 очко, 189-ўрин

8. Жаҳонгир Воҳидов – 5,5 очко, 195-ўрин

9. Ҳумоюн Бегмуратов – 5 очко, 200-ўрин

Аёллар:

1. Умида Омонова – 8 очко, 3-ўрин

2. Гулруҳбегим Тохиржонова – 6 очко, 37-ўрин

3. Мадинабону Халилова – 5,5 очко, 45-ўрин

4. Афруза Ҳамдамова – 5,5 очко, 55-ўрин

5. Гулдона Каримова – 3,5 очко, 121-ўрин

6. Нилуфар Якуббаева – 3 очко, 125-ўрин