Бобоусмон Батуров: "Вақтим келди. Имкониятни қўлдан бой бермоқчи эмасман"

"Айни пайтда Тошкент вилоятидаги "Янгиобод" ўқув базасида шаҳсий мураббийларимиз ва терма жамоадаги устозларимиз бошчилигида машғулотларга зўр берганмиз. Олдимизда Олимпия ўйинларига йўлланма берувчи лицензион мусобақа турибди. Ҳозирча таркиб тўлиқ аниқланмаган. Яқин орада -63 кг ва -69 кг вазн тоифаларида спарринг жанглар ташкил этилади ва шундан сўнг мусобақада иштирок этадиган боксчилар номи маълум бўлади. Менинг вазнимда Шаҳрам Ғиёсов ҳам ҳаваскор боксга қайтди. Унга қарши жанг қиламан ва ғолиб лицензион мусобақада иштирок этади. 

Мен барчасига тайёрман. Кимдир кумушни олтин қилмоқчи бўлса, кимдадир Олимпиадада иштирок этиш ва олтин медаль қўлга киритиш орзуси бор. Барча нарсанинг ўз вақти соати бор. Ўйлайманки, менинг вақтим келди. Мен имкониятни қўлдан бой бермоқчи эмасман. Барчаси Оллоҳдан, кимга насиб қилган бўлса ўша боради. Мен ҳам энг кучли боксчи Олимпиадага бориши тарафдориман. Чунки, барчамизнинг мақсадимиз ватанимиз байроғини юқорига кўтаришдир. 

Қолаверса юртбошимиз менга ишонч билдирдилар. Уларга ҳам Олимпиада олтин медалини олиб келаман деб ваъда берганман.

Ҳозирда мени ЖЧда англиялик рақибимга имкониятни бой бериб қўйганим учун танқид қиллишмоқда. Баҳона эмас, лекин жангдан бир кун олдин касалхонага тушганим жангда панд берди. Айни пайтда мен ажойиб спорт формасидаман. Мени қўллаб-қувватлаётган барчага раҳмат айтаман. Худо хоҳласа ишончингизни оқлайман", - деди Бобоусмон Батуров.