Бобур Қурбонов Prime FL камари учун жанг қилади. Рақиб, сана ва манзил маълум + ПОСТЕР

Қўлқопсиз жанг қоидаси асносида ўтказиладиган оқшомнинг асосий тўқнашувида россиялик Ильнар "Хантер" Ишимбаев ўрта вазн тоифасида (84 кг) ҳамюртимиз Бобур Қурбоновга қарши рингга кўтарилади. Қаршилик аралаш яккакураш устамиз қисқа огоҳлантириш билан ушбу чемпионлик жангини қабул қилди. Қурбонов сафдан чиққан Хамзат Куриевнинг ўрнини эгаллади.  

Ишимбаев ғалаба қозонган тақдирда лига тарихида илк бор икки вазнда Prime FL чемпионига айланади. У ҳозирда яримўрта вазн (77 кг) тоифасида чемпионлик камарига эгалик қилмоқда. 

Турнирнинг аҳамияти жиҳатидан иккинчи жанги ҳам Prime FL камари учун кечади. Енгил вазн тоифасида кечадиган жангда россияликлар Филипп Косирев ва Магомедали "Маугли" Магомедрасулов ўзаро рингда тўқнаш келади. Бу трилогия жанги бўлиб, ҳозирча томонлар биттадан ғалабага эга бўлиб турибди — 1:1.