Богдан Гусков UFC`даги кейинги рақиби ким бўлишини айтди

Гусков Абу-Дабида ўтган UFC турнирида россиялик Никита Криловни биринчи раунддаёқ техник нокаут эвазига мағлубиятга учратганди. Богдан кейинги рақиби рақиби собиқ UFC чемпиони Жамал Хилл бўлишига ишонмоқда. Жамал айни пайтда дивизион рейтингининг 6-поғонасини банд этган. 

"Бизда аниқ факт бўйича уч нафар рақиб бор: Волкан Оздемир, Ян Блахович ва Жамал Хилл. Улар орасида энг идеал вариант – Хилл билан жанг ҳисобланади. У собиқ чемпион бўлиб, рейтинги ҳам мендан юқорида. Блахович яна ҳам баландда, лекин Ян Топ-5`да ва менимча, у билан жанг ўтказиш имкониятим пастроқ. Хилл эса мен учун чемпионлик йўлидаги катта қадам бўлади. Аввалига Топ-10, кейин Топ-5 рейтинги вакили билан жанг ва кейинги қадам чемпионлик! Айнан шундай режа амалга ошса, ажойиб иш бўлар эди", – деди Гусков. 

Маълумот учун, Богдан Гусков UFC промоушенида кетма-кет 4 та жангда ғалаба қозонди. Жангларининг барида рақибларини муддатидан аввал енгди. Жамал Хилл эса июнь ойида кетма-кет учинчи мағлубиятини қабул қилиб олди. Сўнгги жангида Халил Раунтрига имкониятни бой берди.