Бокс. Онлайн семинарда водийлик мураббийлар ўзларига керакли маълумотлар олишди

Бугун, онлайн семинарнинг иккинчи кунида Андижон, Фарғона ва Наманган вилояти вакиллари иштирок этишди. 

Режага биноан эрталабки семинарда Ўзбекистон давлат жисмоний тарбия университети вакиллари, профессор Рустам Халмухаммедов бошчилигидаги ўқитувчилар ўзларининг қизиқарли маълумотларини мутахассисларга етказишди. Кафедра ўқитувчилари Дилнавоз Бердиева "Вирусли касалликларга қарши курашиш тамойиллари", Валихан Анашев эса "Пандемия давридан кейин спортчиларнинг иш қобилиятини тиклашнинг биокимёвий асослари" мавзусида маъруза қилишди. 

Куннинг иккинчи қисмида эса Ўзбекистон бокс федерацияси бош котиби Муроджон Мамадалиев бошчилигида ташкилий масалаларга бағишланган семинар ўтказилди. М. Мамадалиев карантин даврида машғулот олиб бориш, режалар ҳақида гапириб берди. Терма жамоа катта мураббийи эса пандемия даврида спортчиларни назорат қилиш, олдинда кутиб турган мусобақалар ва бошқа ташкилий жиҳатлар ҳақидаги саволларга жавоб бериб ўтди. Семинар иштирокчилари ўзларини қизиқтирган саволларга жавоб олишди. 

Эслатиб ўтамиз, мазкур онлайн семинар 15 августга қадар, кунига икки мартадан ташкил этилиши режалаштирилган. 

Ўзбекистон бокс федерацияси матбуот хизмати