Боксчиларимиз навбатдаги онлайн машғулотни ўтказишди

Боксчиларимиз мураббийлар штаби кўрсатмаларига асосан машғулотларни олиб боришди. Ўзбекистон бокс федерацияси раисининг биринчи ўринбосари Сакен Полатов карантин вақтида боксчиларимиз нималар билан банд эканлиги, қандай шароитларда машғулотлар ўтказаётганликлари ҳақида тушунтириб берди. 

Онлайн машғулотни кузатиб борган Миллий олимпия қўмитаси президенти Рустам Шоабдураҳмонов спортчиларимиз учун тегишли тавсияларни берди. Бундан ташқари, мана шундай шароитда машғулотларни тўхтатмай, шуғулланишда давом этаётганликлари учун спортчи ва мураббийларимизга, фаолиятини давом эттираётган, ушбу онлайн машғулотни ташкил этишда жонбозлик кўрсатган Ўзбекистон бокс федерациясига миннатдорчилик билдирди. 

"Кимда қандай муаммолар, саволлар бўлса кўриб чиқишга тайёрмиз. Тўхтаб қолмаслигимиз керак. Айни пайтда бутун дунёда бир ҳил шароит юзага келган. Насиб қилса, вазият жойига тушганидан сўнг Ўзбекистонда юқори савиядаги ички мусобақалар ташкил этамиз", - деди Рустам Шоабдураҳмонов.

Ўзбекистон бокс федерацияси матбуот хизмати