Бошланиши чакки эмас: Оғир атлетикачиларимиздан жаҳон чемпионатидаги иккита медаль

Беллашувларда Ўзбекистон терма жамоасидан дастлаб Оғабек Нафасов баҳсга киришди. -55 кг вазн тоифасида супачага жами 13 атлет кўтарилди.

Биринчи машқ - даст кўтаришда 2018 йили катталар ўртасидаги жаҳон чемпионати иштирокчиси италиялик Сержио Масида 103 кг натижа билан барчани ортда қолдирди. Пешқадамга 1 кг ютқазган Нафасов иккинчи ўрин билан кифояланди. Кучли учликдан озарбайжонлик Омар Жаводов жой олди.

Шу тариқа, Огабек делегациямизга илк медаль - кумуш мукофотни келтирди. Иккинчи машқ - силтаб кўтаришда шаҳрисабзлик йигит 121 кг натижа билан тўртинчи бўлди.

Иккикурашда эса Италия вакилидан сўнг иккинчи ўринни эгаллади ва катта кумуш медаль соҳибига айланди.

Нафасов Самарқандда оғир атлетика билан шуғулланаётганига икки йил бўлди, холос. Терма жамоа таркибига ўтган йил кузда жалб этилди. Акобир Усмоновнинг истеъдодли шогирдини олдинда яна кўплаб ёрқин зафарлар кутиб турибди деб ишонамиз.

Мирзаҳаким Тўхтамирзаев,

Лас-Вегас, АҚШ