Ботир Аҳмедов Наоя Иноуэ қандай ҳолатда Аҳмадалиевга ютқазиши мумкинлигини айтди

"Бу жангга объектив ёндашган ҳолда ўз фикримни билдираман. Иноуэнинг сўнгги икки жангини кўрдингизми? У Луис Неридан нокдаун қабул қилиб олди. Сўнгги жангида энди уни Диаснинг залида машғулот ўтказаётган йигит Рамон Карденас йиқитди. Агар шундай боксчилардан нокдаун қабул қилиб олган бўлса, Наоя Аҳмадалиевнинг зарбаларига дош бера олармикан? Мен Муроджоннинг зарба кучини биламан ва ҳис қилганим учун шундай деяпман. У билан спарринг-жангларда ишлаганмиз. Ишонинг, агар Иноуэ Аҳмадалиевнинг аниқ ва кучли зарбасини ўтказиб юборса, у ўрнидан тура олмайди.

Умуман олганда, сизу бизни рақобатли жанг кутмоқда. Шахсан мен Муроджонни жанг фаворити деб ҳисоблайман. Чунки, бу вазн айна Аҳмадалиевники, Иноуэ эса бу ерга енгил вазндан кўтарилган. Бу ҳолат ҳам Муроджоннинг фойдасига ишлаши мумкин бўлган жиддий сабаблардан бири", - деди Аҳмедов.

Эслатиб ўтамиз, Иноуэ ва Аҳмадалиев ўртасидаги жанг эртага, 14 сентябрь куни Японияда бўлиб ўтади.