Ботир Аҳмедов собиқ Жаҳон чемпионини мағлуб этди

Унда ҳамюртимиз, асли сирдарёлик, ҳозирда Россия байроғи остида жанг олиб бораётган Ботир Аҳмедов биринчи ярим енгил вазнда (63,5 кг) собиқ жаҳон чемпиони, доминиканлик Архенис Мендес билан учрашуви бўлиб ўтди.

34 ёшли Мендес профессионал боксда жуда катта тажрибага эга бўлган боксчи. Фаолияти мобайнида 25 та жанг ўтказган собиқ жаҳон чемпиони 12 раундга мўлжалланган бокс оқшомида Ахмедовга ўзига хос тарзда “сабоқ” бериш учун муносиб жанг олиб борди. Ҳаттоки айрим раундларда Аҳмедовни мувозанатдан чиқаришга ҳам эришди.

Аммо, профессионал боксда ўз ўрнини тобора мустаҳкамлаб келаётган (9та жангнинг 8 тасини ғалаба билан якунлаган) Аҳмедов мамлакатимизда ўтказилган мусобақалардаги тажрибаси, Россиядаги ўқув-машғулотларидаги кўникмалари натижасида профессионал бокснинг “эски гвардияси” сардорига муносиб қаршилик кўрсатди ва 8-раундда Мендеснинг ринга чиқишдан бош тортиши оқибатида ғолибликка эришди. Аслида, Ботирнинг раундлар мобайнидаги кучли ва тактик зарбалари ўз сўзини айтди.

Шундай қилиб, Ботир Аҳмедов профессионал бокснинг WBA йналишида чемпионликка даъвогарлик ўрнини мустаҳкамлаб олди.

Айтиш лозимки, профессионал бокснинг ушбу йўналиши ва вазнида Шоҳжаҳон Эргашев, Шахрам Ғиёсов ва Ботир Аҳмедов чемпионлик камари учун даҳвогарлик қилиб келмоқда. Шу кунгача яъни, жорий йилнинг июнь холатига кўра, WBA таснифида Шахрам 3-ўринни, Бртир 4-ўринни, Шохжаҳон эса 8-ўринни эгаллаб келаётганди. Ахмедовнинг бу ғалабаси эса уни чемпионликка асосий даъвогар мақомига олиб чиқиши шубҳасиз. 

Тўлқин РЎЗИЕВ.