06 июл 15:18
Янгиликлар

Футбол

"Бу 100 фоизлик коррупция". Бельгия матбуоти — Балогуннинг ЖЧдаги кечиктирилган дисквалификацияси ҳақида

ФИФА интизом қўмитасининг АҚШ терма жамоаси ҳужумчиси Фоларин Балогуннинг автоматик дисквалификациясини кечиктириш ҳақидаги қарори Жаҳон чемпионати — 2026 1/8 финали доирасидаги ушбу жамоалар ўртасидаги ўйин арафасида Бельгия ОАВларида кескин муносабатга сабаб бўлди.

Бу ҳақда RMC Sport хабар бермоқда.

Хусусан, Бельгиянинг RTBF телекомпанияси шарҳловчиси Венсан Ланжандри "Балогун иши: ФИФА футболни ўлдирмоқда" сарлавҳали мақола чоп этди. Унинг фикрича, халқаро федерация президенти Жанни Инфантино ва АҚШ етакчиси Дональд Трамп ўртасидаги алоқа "беъманилик ва ҳатто шармандалик чўққисига" чиққан.

Le Soir газетаси ҳам ФИФА қарорини кескин танқид қилди: "Унчалик ҳам обрўли бўлмаган ушбу ташкилот ўз холислигини кимошди савдосига қўйди".

Het Nieuwsblad таҳририяти эса бундан ҳам қатъийроқ фикр билдирди: "Бу 100 фоизлик коррупция. Тоза сиёсат. Улар шунчаки майдонда энг яхши ўйинчилар тўп суришини хоҳлашади… Инфантино энди спорт раҳбари эмас. У футбол келажагини эмас, ўз империясини қурмоқда".

Эслатиб ўтамиз, Балогун ЖЧ-2026 1/16 финалидан ўрин олган Босния ва Герцеговинага қарши ўйинда майдондан четлатилган эди, бироқ ФИФА кутилмаганда мажбурий дисквалификацияни бир йиллик шартли жазога ўзгартирди. Бунинг шарофати билан Америка жамоасининг жорий биринчиликдаги энг яхши тўпурари 1/8 финалда Бельгияга қарши ўйнаш имкониятига эга бўлади.