"Бу ҳақда ҳамма жим". Стрикленд UFC’ни кескин танқид қилиб, ташкилотни тарк этиш ниятини билдирди

"UFC ҳақида ҳамма жим турадиган бир нарсани айтмоқчиман. Чемпионларга, дивизионни бошқараётган ҳақиқий жангчиларга қаранг. Улар мағлуб бўлишади, кейин яна қайтишади. Шундан сўнг яна уч-тўрт марта жанг қилишади ва охирида қаттиқ нокаутга учрашади.

Шунда сен: “Унга нима бўлди?” деб ўйлайсан. Кейин тушунасанки, унга UFC таъсир қилган.

UFC жангчиларга шундай ҳақ тўласинки, улар фаолиятини якунлаб: “Оғайни, бўлди, келажагимни таъминлаб олдим”, деб бемалол кетишсин. Ташкилот сенинг меросингни яратади, сени ўша ерда ушлаб туради, лекин етарлича пул тўламайди. Натижада яна қайтишга ва ўзинг яратган меросингни барбод қилишга мажбур бўласан.

Мен бундай қилишни истамайман, йигитлар. Бу энди менга қизиқ эмас. Бокс билан шуғулланиб, бокс бўйича чемпионлик камарини қўлга киритмоқчиман. Ҳозир шу масалани ҳал қилишга ҳаракат қиляпмиз.

Аммо UFC бунга рози бўлмаслигини ва мени жанг қилишга мажбурлашини айтса, майли, муаммо йўқ. Шунчаки октагонда туриб, зарбалар беришга ва улардан қочишга ҳаракат қиламан. Мухлислар мени ҳуштакбозлик билан қарши олишадими? Мен ҳам сизлар билан бирга ҳуштак чаламан. Пулимни оламан ва ўз йўлимда давом этаман", — деди Стрикленд ижтимоий тармоқдаги саҳифасида эълон қилинган видеода.

Стрикленднинг профессионал ММА фаолиятида 31 та ғалаба, шулардан 16 таси муддатидан олдин, ҳамда 7 та мағлубият бор. У профессионал ММАдаги дебютини 2008 йил март ойида ўтказган.

Унинг сўнгги жанги UFC 328 турнирида бўлиб ўтган. Унда Стрикленд Хамзат Чимаевни очколар эвазига мағлуб этган.