Бугун 105 000 доллар мукофот жамғармасига эга UzChess Cup турнири бошланади

Иккинчи бор ташкил этилаётган UzChess Cup турнирининг умумий мукофот жамғармаси 105 000 АҚШ долларидан иборат бўлиб, Masters, Challengers ва Futures гуруҳларида ўтказилади. Кучлилар жам бўлган Masters гуруҳида россиялик жаҳон чемпиони Ян Непомняший, ҳиндистонлик таниқли гроссмейстерлар Аравиндҳ Читамбарам, Рамешбабу Прагнанандҳа, Аржун Эргаиси, эронлик Парҳам Мақсудлу, ўзимизнинг қоракўз гроссмейстерлар Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидов чемпионлик ҳамда совринли ўринлар учун баҳс олиб боради.      

FIDE Circiut учун қимматли рейтинг очколари ўйналадиган ушбу халқаро турнирга қуръа ташланиб, 9 тур учун барча жуфтликлар маълум бўлди. Бугун соат 14:30 да бошланадиган 1-тур учрашувида ўзбек дербисига гувоҳ бўламиз. Нодирбек Абдусатторов оқ доналарда Шамсиддин Воҳидовга қарши баҳс олиб боради. Жавоҳир Синдаров эса қора доналарда Ян Непомняший билан ҳисоб-китоб қилади. 

Турнирнинг Challengers гуруҳида Гулруҳбегим Тоҳиржонова ҳам иштирок этади. У ўзига хос ўзбек дербисида Жаҳонгир Воҳидовга қарши оқ доналарда ўйнайди. Бу гуруҳда ҳамюртларимиздан Муҳиддин Мадаминов ва Муҳаммадзоҳид Суяров ҳам бор.