Бугун 729 кунлик танаффусдан сўнг Уфада спорт курашлари бўйича жаҳон чемпионати бошланади

Йигирма бир ёшгача бўлган курашчилар ўртасида ташкил этилаётган дунё биринчилигида Ўзбекистон терма жамоасининг икки аъзоси ҳам гиламга чиқади. Бизга номаълум сабаблар туфайли терма жамоамиз жаҳон чемпионатида тўлиқ таркибда қатнаша олмайди.

Уфа гиламларида юртимиз шарафини ўсмирлар ва ёшлар ўртасида жаҳон чемпиони, 2018 йил Аргентинада ўтган учинчи ўсмирлар Олимпиадаси ғолиби, "Спорт Оскари" мукофоти соҳиби Умиджон Жалолов (61 кг) ҳамда ўсмирлар Олимпиадасининг бронза медали соҳиби Муҳаммадрасул Раҳимов (92 кг) ҳимоя қилади. Уларнинг ҳар иккиси эртанги беллашувларда гиламга чиқади.

729 кунлик танаффусдан сўнг ўтказилаётган ёшлар ўртасидаги жаҳон чемпионатида дунёнинг 53 давлатидан 500 нафардан зиёд курашчилар 120 та медаллар жамланмаси учун бахсларга киришадилар. Бундан аввалги жаҳон чемпионати 2019 йили Эстониянинг Таллин шаҳрида бўлиб ўтган эди. Пандемик вазият сабаб ўтган йили ёшлар ўртасида жаҳон чемпионати ўтказилмади.

Қуръа натижасига кўра 19 ёшли Умиджон Жалолов ўз иштирокини тўғридан-тўғри 1/8 финалдан бошлайди. Унинг рақиби қозоғистонлик Саламат Маликов ҳамда озарбайжонлик Абдулфаз Насиров ўртасидаги беллашувдан сўнг маълум бўлади. 20 ёшли Муҳаммадрасул Раҳимов эса 1/8 финалда АҚШ курашчиси, 19 ёшли Рокки Жозеф Эламга қарши баҳс олиб боради.