Бугун энг совриндор ёш курашчимиз жаҳон чемпионати медаллари учун гиламга чиқади

Йигирма бир ёшгача бўлган курашчилар ўртасида ташкил этилаётган дунё биринчилигида сайёрамизнинг 53 давлатидан 500 нафардан зиёд курашчилари қаторида Ўзбекистон эркин ва юнон-рум курашлари терма жамоаси аъзолари ҳам гиламга чиқади. 

Бугун ўсмирлар ва ёшлар ўртасида жаҳон чемпиони, 2018 йил Аргентинада ўтган учинчи ўсмирлар Олимпиадаси ғолиби, "Спорт Оскари" мукофоти соҳиби Умиджон Жалолов (61 кг) ҳамда ўсмирлар Олимпиадасининг бронза медали соҳиби Муҳаммадрасул Раҳимов (92 кг) жаҳон чемионатидаги иштирокини бошлайди. 

Қуръа натижасига кўра 19 ёшли Умиджон Жалолов ўз иштирокини тўғридан-тўғри 1/8 финалдан бошлайди. Унинг рақиби қозоғистонлик Саламат Маликов ҳамда озарбайжонлик Абдулфаз Насиров ўртасидаги беллашувдан сўнг маълум бўлади. 20 ёшли Муҳаммадрасул Раҳимов эса 1/8 финалда АҚШ курашчиси, 19 ёшли Рокки Жозеф Эламга қарши баҳс олиб боради.