Бугун Лайлохон, Шоҳида ва Набира Олимпиада лицензияси учун сўнгги уринишни амалга оширади

Ушбу мусобақада эркин, юнон-рум ва аёллар кураши вакиллари Олимпиадага йўлланмани қўлга киритиш учун сўнгги имкониятдан фойдаланишяпти. Кеча лицензион турнирнинг илк куни юнон-рум кураши бўйича беллашувлари бошланганди. 

Афсуски, терма жамоамизнинг ҳар икки вакили Маҳмуд Бахшиллоев ва Жалгасбай Бердимуратов саралаш босқичидаёқ мағлубиятга учраб, Париж-2024 Олимпиадаси лицензиясини қўлга кирита олишмаган эди. 

Шу тариқа, Париж-2024 Олимпиадасида юнон-рум кураши баҳсларида уч нафар вакилимиз - Исломжон Баҳромов (-60 кг), Арам Варданьян (-77 кг) ва Рустам Ассакалов (-97 кг) иштирок этадиган бўлди. Бу ижобий натижа эмас!

Бугун Истанбулдаги сўнгги лицензион турнирда 3 нафар курашчи қизимиз Олимпия ўйинларига бериладиган сўнгги йўлланмалар учун баҳсларга киришади. Шоҳида Аҳмедова (-53 кг), Лайлохон Собирова (-57 кг) ва Набира Эсенбаева (-68 кг) Истанбул гиламларида лицензиялар учун баҳсларга киришади.  

Курашчи қизларимиз учун қуръа натижаси:

53 кг: Квалификация раунди. Шоҳида Аҳмедова - Юснейри Агразал Вест (Панама)

57 кг: 1/8 финал. Лайлохон Собирова - Рамона Галамбос (Венгрия)/Алёна Колесник (Озарбайжон)

68 кг: 1/8 финал. Набира Эсенбаева - Дануте Домикайтите (Литва)/Линда Мораис (Канада)  

Эслатиб ўтамиз, Абдурауф Бозорбоев мураббийлигидаги аёллар кураши терма жамоамиз Бишкекдаги Осиё лицензион турнирида Олимпиадага 1 та йўлланмани қўлга киритиб, бу борада янги тарих саҳифасини очган эди. Актенге Кеунимжаева (-50 кг) ўз йўлланмаси билан Олимпиадада қатнашадиган биринчи ўзбек курашчи қизи сифатида тарихга киради.