Бугун "Миллий спорт мукофоти-2025" тақдирлаш маросими ўтказилади. Кимлар энг яхши бўлиши мумкин?

Унда бир нечта номинация бўйича ғолиблар тақдирланади. Якунига етиб бораётган йил давомида ўзбекистонлик спортчилар жаҳон ва Осиё чемпионатлари, шунингдек, комплекс мусобақаларда иштирок этишди.

Шундан келиб чиқиб, 2025 йилда Ўзбекистоннинг энг яхши эркак спортчиси деб топилиши мумкин бўлган номзодлар сони ҳам етарлича. 

Хусусан, 24 йиллик танаффусдан кейин катталар ўртасидаги Жаҳон чемпионатининг юнон-рум кураш баҳсларида Ўзбекистонга олтин медални тақдим этган 19 ёшли Айтжан Халмаханов, дунё биринчилиги ва Ислом Бирдамлиги ўйинларида муваффақиятли иштирок этган оғир атлетикачимиз Акбар Жўраев, боксдаги "гегемонлик"ни Ливерпулдаги World Boxing Жаҳон чемпионатида ҳам давом эттирган Абдумалик Халоков, Асадхўжа Мўйдинхўжаев, шунингдек, таэквондо WT бўйича Жаҳон чемпионатида олтин медалга эга чиққан иккинчи ўзбекистонлик эркак спортчига айланган Нажмиддин Қосимхожиев шулар жумласидан. 

Юқорида тилга олинган спортчиларимизнинг номзодлари МОҚ томонидан расман эълон қилинмаган бўлса-да, тахминимизча улардан бири энг яхши деб топилади. Бу рўйхат янада кенгроқ бўлиши ҳам мумкин.

Аёл спортчиларимиз орасидан эса каратэ бўйича илк ўзбекистонлик Жаҳон чемпионига айланган Гулшан Алимардонованинг 2025 йилда Ўзбекистоннинг энг яхши аёл спортчиси бўлиш имконияти анча юқори. Фаолияти давомида учинчи маротаба Жаҳон чемпионати шоҳсупасига кўтарилган Светлана Осипова, Ислом бирдамлиги ўйинларида муваффақиятли чиқиш қилган Актенге Кеунимжаева номзодларини бу борада тахмин қилиш мумкин.

Демак, бугун Ўзбекистоннинг 2025 йилдаги энг яхшиларини билиб оламиз.