"Бунёдкор" клуби ёши "урилган" футболчи ҳақида маълумот берди

Мақолада "Бунёдкор" U-19 жамоаси сафида рўйхатдан ўтган, аммо бугунги кунда юридик томондан клубга тегишли бўлмаган футболчининг иши бўйича Самарқанд вилояти прокуратурасига мурожаат йўллангани билдирилган.

"Бунёдкор" футбол клуби мазкур иш бўйича қуйидагиларни маълум қилади. Ўзбекистон Профессионал футбол лигаси назарда тутган футболчи 2022 йилнинг январь ойида "Бунёдкор" футбол клуби билан икки йилга мўлжалланган шартнома имзолаган. Яъни, футболчи "Бунёдкор" академияси тарбияланувчиси эмас, балки воҳа клубларидан биридан жамоамиз сафига қўшилган. 2022 йилги мавсумда "Бунёдкор" U-19 сафида рўйхатдан ўтган, мавсум давомида жами 12та учрашувда майдонга тушган. Беллашувларнинг 4тасини асосий таркибда бошлаган бўлса, 8тасида захирадан қўшилган. Умумий ҳисобда 510 дақиқа майдонда тўп тепган. 2023 йилнинг апрель ойида жамоанинг янги бош мураббийи Артур Кагировнинг билдиргиси ва томонларнинг ўзаро келишувга кўра шартнома бекор қилинган.

"Бунёдкор" футбол клуби бу каби ишларга доимо қарши бўлиб келган ва Ўзбекистон Профессионал футбол лигаси ҳамда тегишли ташкилотлар билан ҳамкорликда иш олиб боришини маълум қилади.

“Бунёдкор”да ёши “урилган” футболчи аниқланди. Иш прокуратурага оширилди