Бутунжаҳон шахмат Олимпиадаси. Асосий рақибларимиз 3-турда қандай натижа қайд этишди + ФОТО

Амалдаги Олимпиада чемпиони ҳисобланган Ўзбекистон эркаклар терма жамоаси кетма-кет учта турда ғалабага эришди. Ёш гроссмейстерларимиз 45-Бутунжаҳон шахмат Олимпиадасининг 1-турида Тринидад ва Тобаго, 2-турда Мисрни, 3-турда эса Хорватияни бир хил 3,5:0,5 ҳисобида мағлубиятга учратиб, чемпионлик ҳимоясини давом эттиришяпти. 

Терма жамоамизнинг асосий рақиблари ҳам осон ғалабаларга эришишмоқда. Ҳиндистон терма жамоаси кеча ўтказилган 3-турда Венгрияни 3,5:05, Хитой Словенияни 3:1, АҚШ Болгарияни 3,5:0,5, Озарбайжон Молдовани 3:1, Арманистон Бразилияни 3:1 ҳисобида таслим этди. 

Жами 16 давлат терма жамоалари 100 фоизлик очко қўлга киритиб, қўшимча кўрсаткичларга кўра жадвалда етакчилик қилишяпти. Бу турда бироз кутилмаганда Италия Нидерландияни 3:1, Литва Германияни 2,5:1,5 ҳисобида таслим этиб қўйди.

Кеча ўтказилган 3-турда Украина Австралиядан 2,5:1,5, Сербия Швейцариядан 2,5:1,5, Магнус Карлсен бошчилигидаги Норвегия эса Колумбия терма жамоасидан 3,5:0,5 ҳисобида устун келди.