Бутунжаҳон шахмат Олимпиадаси. Қизларимиз 100 фоиз ғалаба қайд этган 7 давлат қаторида + ФОТО

Ўзбекистон аёллар терма жамоаси кетма-кет тўртта турда ғалабага эришди. Қизларимиз 45-Бутунжаҳон шахмат Олимпиадасининг 1-турида Гаитини 4:0, 2-турда Анголани 3:1, 3-турда Венгрияни 2,5:1,5, кеча ўтказилган 4-турда эса Болгарияни 2,5:1,5 ҳисобида мағлубиятга учратиб, 100 фоизлик натижа қайд этган 7 давлат қаторида бўлиб туришибди. Тўртинчи тур олдидан бундай жамоалар сони 16 та эди.  

Терма жамоамизнинг асосий рақибалари 4-турда осон ғалабаларга эришишди. Хитой терма жамоаси барча учрашувларида рақибаларини бир хил 4:0 ҳисобида енгиб, чемпионлик учун асосий даъвогар эканликларини исботлаб келишяпти. Кеча Англия терма жамоаси худди шу ҳисобда таслим этилди.

Ҳиндистон терма жамоаси 4-турда Францияни 3,5:0,5, таркибида Гулруҳбегим Тоҳиржонова ўйнаётган АҚШ термаси Нидерландияни 3,5:0,5, Арманистон Вьетнамни 3:1, Қозоғистон Сербияни 2,5:1,5, Мўғулистон Испанияни 2,5:1,5 ҳисобида таслим этди. 

Бугун ўтказиладиган 5-турда 3 та жуфтликда 100 фоизлик натижа қайд этган терма жамоалар ўзаро тўқнаш келишади ва табиийки фақат ғалаба қозонган давлатлар сони тенг ярмига камаяди. 

5-турнинг марказий учрашувлари:

Қозоғистон - Ҳиндистон

Хитой - Арманистон

Мўғулистон - АҚШ

Ўзбекистон - Грузия