Чимаев, Царукян, Тони Фергюсон "жанг" қилган RAF 10 турнирининг барча натижалари

Эътиборлиси, Токио-2020 Олимпия ўйинлари совриндори Бекзод Абдураҳмонов дунёнинг юлдуз эркин ҳамда аралаш яккакураш усталари иштирок этаётган RAF лигасидаги дебют беллашувини муваффақиятсиз ўтказди. Ҳамюртимиз турнир кардида Киган О'Тулга 6-10 ҳисобида имкониятни бой бериб қўйди. 

RAF 10 турнирининг асосий беллашуви оралиқ вазнда ўтказилди ва унда собиқ UFC чемпиони Хамзат Чимаев Диллон Дэнисга қарши гиламга чиқди. БАА шарафини ҳимоя қилаётган чеченистонлик аралаш яккакураш устаси биринчи бўлимнинг ўзидаёқ рақибининг оёғини ушлаб олди, партерга ўтказди ва туше, яъни соф ғалаба билан беллашувни ўз фойдасига ҳал қилди. Бу Хамзатнинг лигадаги дебют ғалабаси, Дэниснинг эса иккинчи мағлубияти бўлди. Баҳс якунига етиши билан гиламда оммавий муштлашув юзага келди.   

Аҳамияти жиҳатидан иккинчи муҳим жангда амалдаги ва собиқ UFC жангчилари Арман Царукян ҳамда Тони Фергюсон ўзаро кураш гиламида тўқнаш келди. Кетма-кет балларни жамғарган Арман иккинчи бўлимда ҳисобни 10:0 кўринишига келтирди ва муддатидан аввал техник ғалабани қўлга киритди. 

RAF 10 турнири жанглари натижалари:

Хамзат Чимаев Диллон Дэнисни туше, яъни партерда ушлаш эвазига муддатидан аввал мағлуб этди

Арман Царукян Тони Фергюсонни муддатидан аввал техник устунлик эвазига енгди (10-0)

Аарон Пико Лэнс Палмерни техник устунлик эвазига таслим этди (12-1)

Лусия Йепес рақибаси Кендра Райандан техник устунлик ҳисобига устун келди (13-2) – Йепес аёллар минимал вазн тоифасида вақтинчалик RAF камарини қўлга киритди

Остин ДеСанто Рейньери Андреуни кичик устун билан мағлубиятга учратди (2-1) – беллашувда ўта енгил вазнда RAF камари учун кечди

Ризабек Айтмухан Хейден Зиллмерни очколар бўйича ютди (6-4)

Себастьян Ривера Хаджи Алиевни очколар ҳисобига кўра енгди (9-5)

Киган О'Тул Бекзод Абдураҳмоновдан устун келди (10-6)

Эндрю Алириз Жейдин Айерманни мағлуб этди (5-3)

Шамиль Шарипов Йонгер Бастиддан устун эканини исботлади (5-3)

Арсен Арутюнян Калеб Смитни техник устунлик эвазига муддатидан олдин ютди (14-4)