Чирчиқ спорт мактаби мураббийи Тайпейда олтин медаль қўлга киритди

Аҳамиятлиси, мазкур нуфузли халқаро мусобақада иштирок этган ҳамюртимиз Аваз Корганов 90 кг. вазн тоифасида барча рақибларини мағлубиятга учратиб, олтин медални қўлга киритди. 

Айни пайтда 37 ёшда бўлган олтин медаль соҳиби Аваз Корганов болалигидан ҳозирга қадар дзюдо гиламида Ватани, жамоаси манфаатини, ютуқларини муносиб ҳимоя қилиб келмоқда. Аваз Корганов 2007 йил, 19 ёшида Ўзбекистон чемпиони бўлиб, мамлакат миллий терма жамоасига қабул қилинди. Терма жамоа сафида  2008 йилда Токиода ўтган жаҳон чемпионатида жамоавий баҳсларда кумуш медалга эришди.

Шунингдек, терма жамоа таркибида унга 2009 йил Туркияда, 2011 йил Эронда, 2012 йилда Тошкентда ўтган халқаро мусобақаларда кучли учликдан жой олиш насиб этди. Жароҳати туфайли Лондон-2012 Олимпиадасида қатнаша олмаган бўлса-да, дзюдо спортни ташлаб кетмади. Аксинча, майдонга мураббий сифатида қайтишга муваффақ бўлди. Бир муддат Сергели туман спорт мактабида мураббийлик қилди, сўнгра уч йил давомида Жанубий Кореяда ҳам фаолият кўрсатди. 

2021 йилдан Чирчиқ шаҳар спорт мактабида дзюдо бўлимида ишлаш асносида кўплаб ёшларни ўз ортидан эргаштира олди. Яъники, шогирдларини ҳам ўзи каби дюздо гиламидан ғолибона тарк этишга ўргатди ва ўргатмоқда. Дзюдо сирларини ўрганаётган 50 нафардан ортиқ ўғил-қизлар орасида иқтидорлилари талайгина. 

Дарвоқе, Аваз Корганов 2024 йил ноябрь ойида АҚШнинг Лас-Вегас шаҳри мезбонлик қилган дзюдо бўйича фахрийлар ўртасидаги жаҳон чемпионатида ҳам 90 кг. вазн тоифасида италиялик, бразилиялик, АҚШ ҳамда франциялик курашчиларни енгиб, финалга қадар етиб бориб, кумуш медаль соҳибига айланганди. Демак, марра баланд олинган ва  машғулотларга зўр берилганки,  эндиги уруниш олтинга айланди. 

Баракалла  спортчи - мураббий!

Илҳом РАҲМОНОВ тайёрлади