Чирчиқда бадиий гимнастика бўйича очиқ турнир ўтказилди ФОТОГАЛЕРЕЯ

Ўзбекистон гимнастика федерацияси, “Маҳалла” хайрия жамоат фонди Чирчиқ шаҳар бўлими, Ўзбекистон давлат жисмоний тарбия ва спорт университети билан ҳамкорликда ўтказилган мазкур очиқ турнирда Тошкент шаҳри, Сирдарё, Жиззах, Самарқанд, Қашқадарё, Бухоро, Фарғона, Андижон, Наманган ҳамда Тошкент вилоятидан 300 нафардан ортиқ ёш спортчи-қиз иштирок этди.

Мусобақада 4 ёшдан 14 ёшгача бўлган бадиий гимнастикачилар булава, арғамчи, ҳалқа, тўп, тасма каби буюмларда бажариладиган нозик ва нафис машқларни ўзлари танлаган мусиқа садолари уйғунлигида намойиш этишди.

Муросасиз ўтган беллашувларнинг якуний натижасига кўра, Чирчиқ шаҳри жамоаси фахрли биринчи ўринни қўлга киритди. Иккинчи ўринни Тошкент шаҳри жамоаси эгаллаган бўлса, учинчи ўрин Самарқанд вилояти қизларига насиб этди. Ғолиб ва совриндорлар ташкилотчилар томонидан диплом, медаль ва эсдалик совғалари билан мукофотланишди.

Айтиш жоиз, мусобақада иштирок этган жажжи қизалоқлар ўз имкониятларини синовдан ўтказишлари билан бирга ўзлари учун маҳорат сабоқлари ҳам олиш имкониятига эга бўлишди.

Ригина Дадажонова, бадиий гимнастика мураббийи: 

- Ҳозирда Чирчиқ шаҳрида 100 нафардан ортиқ ёш қизларга бадиий гимнастика бўйича сабоқ бериб, маҳоратларини ошириб келяпмиз. Ушбу мусобақада ҳам терма жамоамиз муваффақиятли иштирок этиб, ғолибликни қўлга киритишди. Шогирдларимиздан Шахруза Собиржонова ҳамда Фелез Амирхамзаевалар  20 декабрда Дубай шаҳрида ўтадиган бадиий гимнастика бўйича халқаро турнирда иштирок этишади. Мазкур турнир улар учун ўзига хос синов вазифасини ҳам ўтаб берди. Фурсатдан фойдаланиб, барча юртдошларимизни Конституциямиз қабул қилинган куннинг 29 йиллиги билан табриклаймиз.

Илҳом РАҲМОНОВ тайёрлади