Чисора фаолиятидаги энг катта вазн билан Деонтей Уайлдерга қарши рингга кўтарилади

Кеча бўлиб ўтган вазн ўлчаш маросимида Чисора 121 кг вазн кўрсатди, бу бир йилдан сал кўпроқ вақт олдин бўлиб ўтган авваги жангдагидан 3,3 кгга кўп ва 2016 йилда унчалик машҳур бўлмаган Дражан Янянинга қарши жанги олдидан қайд этган рекорд вазнидан 2 кгга кўпдир.

Чисоранинг рақиби, 40 ёшли собиқ WBC чемпиони Деонтей Уайлдер аввалги жангидагидан ярим килограмм оғирроқ тош босди - 102,7 кг. Бу Уайлдер учун анча стандарт вазн бўлиб, у аксарият жангларда 97 дан 103 кг гача вазн кўрсатган. Фақат Тайсон Фьюри билан учинчи жанг олдидан ўз вазнини сезиларли даражада ошириб, 108 кг вазн қайд этган.

Дерек Чисора ва Деонтей Уайлдер ўртасидаги жанг бугун Лондонда бўлиб ўтадиган проф бокс оқшомининг асосий воқеаси бўлади. Бугунги турнир Queensberry Promotions промоутерлик компанияси томонидан ташкил этилмоқда.