Чжэн Zhengzhou Open бош совринини Чжэнчжоуда олиб қолди

Дунёнинг 24-ракеткаси бўлиб турган хитойлик Чжэн Циньвэнь мухлислар олқиши ёрдамида бош совринни ўз мамлакатида олиб қолишга муваффақ бўлди. Чжен икки ярим соат давом этган финал баҳсида WTA рейтингида ўзидан 6 поғона юқорида бораётган чехиялик Барбора Крейчиковани мағлубиятга учратди - 2/6, 6/2, 6/4.

Бу теннисчиларнинг ўзаро ўтказган илк учрашуви сифатида тарихга кирди. Циньвэнь Чжэн 10, Крейчикова 4 та эйс зарбани амалга оширган. Қўшхатолар Барборада кўпроқ бўлди - 6 га 5. Брейклар бўйича худди шундай сон статистикаси Чин юрти вакиласи фойдасига.

Bank of Communications Zhengzhou Open турниридаги муваффақиятли иштирок хитойлик теннисчига 470 рейтинг очкоси ҳамда 120,150 доллар мукофот пули келтирди. У бугун эълон қилинадиган янгиланган WTA рейтингида Топ-20`га қайтади.