Циципас Марселда чемпионлик унвонини ҳимоя қилди

Дунёнинг олтинчи ракеткаси ҳал қилувчи финал учрашувида рейтингнинг 18-поғонасидан жой олган канадалик 19 ёшли Феликс Ожега қарши кортга чиқди. 21 ёшли Стефанос 1 соату 26 дақиқа давом этган баҳсда ғалабага эришди - 6/3, 6/4.

Шу тариқа, Циципас чемпионлик унвонини ҳимоя қилди. Икки теннисчининг ўзаро учрашувларидаги ҳисоб мувозанати эса тикланди - 2:2. Бу грециялик теннисчининг фаолиятидаги бешинчи соврини бўлди. Open 13 турниридаги муваффақиятли иштирок Циципасга 116,030 евро мукофот пули ҳамда 250 рейтинг очкоси келтирди.