Циципас "Мастерс" иккинчи даврасида 118-ракеткага ютқазиб қўйди

Жумладан, дунёнинг еттинчи ракеткаси Стефанос Циципас иккинчи даврадаёқ ўз юришини тўхтатди. Грециялик теннисчи кутилмаганда ATP рейтингида 118-поғонада бораётган бразилиялик Тьяго Монтейрога икки сетда ҳам бир хил ҳисобда ютқазиб қўйди - 4/6, 4/6.

Бу теннисчиларнинг ўзаро ўтказган илк учрашуви эди. Тўқсон олти дақиқа давом этган баҳсда иккала теннисчи ҳам 4 тадан эйс зарбасини амалга оширган. Монтейро 2 та брейк эвазига номдор рақибини мағлуб эта олди. Тьяго фаолиятида тўртинчи бор Топ-10`дан ўрин олган теннисчини енгди. 

Таъкидлаш жоиз, у шу йил Рио-де-Жанейро шаҳрида ўтган турнирда испаниялик Карлос Алькараздан ҳам устун келганди. Энди у Mutua Madrid Open турнирининг учинчи босқичида чехиялик Иржи Лехечкага қарши кортга чиқади. Лехечка ўз ўрнида сербиялик Хамад Межедовични 7/5, 6/4 ҳисобида мағлуб этди.