Дана Уайт Оқ уйдаги Дональд Трамп билан учрашуви ҳақида гапирди

Учрашувда у Дональд Трамп томонидан келаси йили АҚШ Мустақиллик кунига бағишлаб Оқ уйда ташкил этиладиган кенг кўламдаги промоушен тадбири ҳамда турнири муҳокама қилинган.

"Ўтган ҳафта биз Оқ уйда бўлдик. Мен ва менинг жамоам. Биз Дональд Трампга режаларимизни тақдимот қилиб бердик ва унинг бу борадаги розилигини олдик - нима ёқади-ю, нима йўқ. Умуман олганда, унга таклифларимиз ёқди. Шу боис энди жараёнга бошимиз билан шўнғиймиз. Барча йўналишдаги ишлар бошланади.

Ўтган сафар Оқ уйда бўлганимда унинг томига чиққандим. У ернинг ҳамма жойида катта калибрли милтиқлар билан снайперлар бор. Телбалик. Хавфсизлик масаласи жуда долзарб бўлади. Биринчи навбатда Махфий хизмат Президентни ҳимоя қилади", - деди Уайт YouTube’даги The Herd with Colin Cowherd каналидаги интервьюсида.

Дананинг сўзларига кўра, тадбир 5000 нафардан кам томошабинга мўлжалланган бўлади. Шунинг баробарида ташкилотчилар Оқ уй яқинидаги боғ ҳудудидан фойдаланишни режалаштирмоқда.

"Бу боғнинг номи эсимда йўқ, лекин у ерда 85 минг кишини жойлаштириш мумкин. Биз катта саҳна ўрнатамиз - ўша ҳафтада бутун Вашингтонни назорат остига оламиз", - деди UFC раҳбари.