Даниэль Кормье октагонга қайтмоқчи, рақиб ҳам маълум

У UFC 321 турнири олдидан Том Аспиналл билан юзма-юз суҳбатда Жаилтон Альмейда каби оғир вазнлилар жанг қилишни билмаслигини ва ўз сўзларини октагонда тасдиқлашга тайёрлигини айтганди.

Жаҳоннинг энг кучли лигаси шарҳловчиси бразилиялик билан жанг қилишга тайёрлигини UFC 322 турнири учун кўргазмали вазн ўлчаш маросими пайтида ҳам маълум қилди.

"Мен Жаилтон Альмейда билан жанг қилишим мумкин эди. У ерда биз фақат кураш бўйича беллашамиз. Альмейда билан яккама-якка олишувда имкониятим бор. Мен ва Жаилтон, октагон ичидаги кураш. Бу хавфсиз. Ҳа, жуда хавфсиз. Иккаламиз ҳам бир-биримизни партерга ўтказамиз. Мен Жаилтон билан муштлашишим ва кейин навбатдаги жангни шарҳлашга боришим мумкин", - деди 46 ёшли Кормье ташкилотнинг оғир вазнли жангчиларидан қайси бирига қарши октагонга чиқиши мумкинлиги ҳақида берилган саволга жавоб берар экан.

Маълумот учун, Даниэль Кормье 2020 йил август ойида чемпионлик трилогиясининг сўнгги жангида Стипе Миочичга очколар бўйича ютқазиб, фаолиятини якунлаганди. Жаилтон Альмейда эса октябрь ойида бўлажак даъвогарлик жангида уч раунд натижаларига кўра Александр Волковга ҳакамларнинг айри қарори билан мағлуб бўлган эди.