Давлат Бобонов: «Менга Президентим ва халқимнинг ишончи куч берди»

 Мукофот олганлар орасида дзюдо бўйича Ўзбекистон терма жамоаси аъзоси, Токио-2020 Олимпиадасининг бронза медали совриндори Давлат Бобонов ҳам бор. Навоий вилояти ўғлони «Ўзбекистон Республикасида хизмат кўрсатган спортчи» фахрий унвонига лойиқ кўрилди. 

«Олимпия ўйинлари бошқа мусобақалар, хусусан жаҳон ва қитъа чемпионатларидан анча юқорида туришига, савияси баланд эканига бевосита ўз иштироким натижасида амин бўлдим», - дейди Бобонов. - «Олимпиадагача шу йилнинг ўзида Қирғизистонда ўтказилган Осиё чемпионатида олтин, Венгриядаги жаҳон чемпионатида кумуш медалларни қўлга киритгандим. Бу икки ютуқ менга Олимпиадада янада куч беришига ишонгандим. Аммо, мусобақа савия ва даражаси, у ердаги ҳарорат мен кутганимдан ҳам юқори экан. Ҳар бир спортчи нафақат ўзи, балки оиласи, яқинлари, Ватани шаънини ҳимоя қилиш учун ҳаракат қилади. Ўз ўрнида мен ҳам бутун мусобақа давомида ортимда 34 миллионлик халқим, ота-онам, яқинларим, оила аъзоларим ва Сиздек Президентим борлигини дилдан ҳис қилиб турдим. Президентим ва халқимнинг ишончи менга қўшимча куч берди. Фурсатдан фойдаланиб, биз спортчиларга қаратаётган эътиборингиз учун миннатдорлик изҳор қиламан. Самолётдан тушишимиз билан бизга Президент совғаси сифатида уй ва машина беришди. Бунинг учун яна бир бор раҳмат айтаман. Бу бизга яна мотивация беради ва насиб қилса, Париж-2024 Олимпиадасида олтин медаллар билан қайтамиз. Шахсан ўзим шу юқори минбардан туриб Париждан чемпион сифатида келишимга ваъда бераман».