Де Ла Хойя "Канело"га мураббийни алмаштиришни маслаҳат берди

"Унга бера оладиган ягона маслаҳатим - янги мураббий топиш, - деди Де Ла Хойя FightHype’га берган интервьюсида. - Мен унга фаолиятини якунлаш бўйича маслаҳат бера олмайман, чунки бу жуда шахсий масала. Лекин унга янги усулларни ўргатадиган янги мураббий топишни маслаҳат беришим мумкин".

"Тасаввур қилинг, у дунёдаги энг яхши мураббийлардан бири, масалан, Ронни Шилдс билан ишлайди. У унга оёқларни қандай ишлатишни, тезлик ва ҳаракатчанликдан фойдаланишни ва оёқларда ҳозиргидек оғир бўлмасликни ўргатади", - дея қўшимча қилди Де Ла Хойя. - Унинг тезлиги ва рефлекслари билан элита рақибларга қарши яна бир нечта жанг ўтказиш имконияти бор, аммо унга янги мураббий керак".

Маълумот учун, Сауль Альварес кўп йиллардан буён мексикалик мураббий Эдди Рейносо билан ҳамкорлик қилиб келади. Мексикаликнинг навбатдаги рақиби ким бўлиши ҳам ҳозирча номаълум. Де Ла Хойянинг сўзларига кўра, Кроуфорднинг ғалабаси Альвареснинг бошқа топ рақиблар билан жанг қилиш имконияти йўқлигини англатмайди.

"Агар "Канело" тўғри рақибга эга бўлса ва унга қарши туриб, жангни бошласа, уни нокаутга учратади. Яъни, мен "Канело"ни "ҳалокатга учраган учувчи" демоқчи эмасман. Мутлақо йўқ. Ҳамма гап рақиб танлашда ва мухлисларидан сўнгги долларни тортиб олишда".