Дэн Хукер: "UFC’ни Царукяндан халос қиламан"

Янги зеландиялик чемпионлик жанги эвазига UFC’га бу хизматни бажонидил кўрсатади.

"Мен кўп одамлардан нафратланаман. Ҳа, унга нисбатан нафрат бор, биз бир-биримизни ёқтирмаслигимиз аниқ. Лекин жанг қанчалик яқин бўлса, буларнинг барчаси орқа планга ўтиб бораверди. Мен жангимиздан жуда хурсандман ва ундан ҳамма нарсани олиш имкониятини интиқлик билан кутяпман. Арман чемпионлик жангига навбатда турган биринчи рақамли даъвогар ва мен бу йигитнинг имкониятини ўғирламоқчиман.

Айнан шунинг учун Царукян билан жанг қилишни сўрадим. Мен Хантер Кэмпбелл ва Шон Шелбига бу жангни менга беришларини илтимос қилдим. Мен уларга: "Биламан, у сизга ҳам ёқмайди - уни йўлдан олиб ташлашимга имкон беринг" деб айтдим. Мен сизни Гамротдан қутқардим, энди Армандан ҳам қутқараман. Лекин бунинг эвазига сиз менга титул жангини берасиз. 

Кеча у билан кўз уриштириб олгандик, қўлчаларини иягимга чўзганида ўзимни кулгидан тўхтата олмадим. Мен унга: "Менинг шимим сенинг қўлингдан узунроқ, оғайни. Бунчалик ҳовлиқма" дедим. Қўл чўзишда мен албатта катта устунликка эгаман. Ҳа, у курашади ва мени чарчатишга ҳаракат қилади, лекин курашнинг энг яхши томони шундаки, икки томон ҳам чарчайди. Шунинг учун мен ундан секинроқ чарчашим керак. Кўриниб турибдики, устунлик менда ва у ҳеч нарса қила олмайди", - деди Хукер Доҳадаги матбуот анжуманида.

Маълумот учун, 22 ноябрь куни Қатар пойтахтида бўлиб ўтадиган UFC Fight Night 265 турнирининг асосий жангида Арман Царукян ва Дэн Хукер ўзаро октагонда тўқнаш келишади. Бу енгил вазнлилар ўртасидаги эҳтимолий даъвогарлик жанги ҳисобланади.