Денис Истомин финал остонасида уч сет тер тўкди

Соврин жамғармаси 50 000 АҚШ долларини ташкил қилувчи ушбу турнирда ҳамюртимиз Денис Истомин биринчи рақам остида ҳаракат қиляпти. Осиё ўйинлари ғолиби Алматида ҳам ғолибона юришини давом эттирмоқда. 

Ҳозиргина якунига етган ярим финал учрашувида теннисчимиз Лукаш Росолга қарши кортга чиқди. Чехиялик 33 ёшли теннисчи ўз вақтида дунёнинг 24-ракеткаси бўлганди. Бир соату 46 дақиқа давом этган мураккаб баҳсда Денис рақибини 3:6, 6:3, 6:4 ҳисобида мағлуб эта олди. 

Эътиборга молик жиҳати шундаки, иккинчи ва учинчи сетларда Истомин 0:2 ҳисобида мағлуб бўла туриб, чиройли тарзда брэйкни амалга ошира олди ва финалга чиқди. 

Таққослаш учун, Денис Истомин дунё рейтингида 103, Лукаш Росол эса 177-ўринни эгаллаб турибди. Теннисчилар шу кунгача ўзаро турнирларда беш маротаба тўқнаш келишганди. Бугун олтинчи учрашувда Денис умумий ҳисобдаги иккинчи ғалабасини тантана қилди. Қолган тўртта баҳсда Росол зафар қучган эди.