Дэвис Кубоги. Истоминсиз ўтадиган Ливан - Ўзбекистон учрашувига қуръа ташланди

Пётр Лебедь бошчилигидаги теннисчиларимиз Жуния шаҳрида Ливан терма жамоаси меҳмони бўлишади. 13-14 сентябрь кунлари ўтказиладиган баҳсларда мамлакатимизнинг биринчи ракеткаси Денис Истомин иштирок эта олмайди. У айни пайтда Туркиянинг Истанбул шаҳрида ўтаётган турнирда муваффақиятли қатнашяпти. 

Бугун Ливан - Ўзбекистон учрашувига бағишланган матбуот анжумани ҳамда қуръа ташлаш маросими бўлиб ўтди.  Унга кўра мусобақанинг биринчи куни иккита яккалик учрашувлари ўтказилади. 

Дастлаб, Санжар Файзиев Ҳали Ҳабибга қарши кортога чиқади. Кейин эса Ҳумоюн Султонов Бенжамин Ҳасанни синовдан ўтказади. Шанба куни жуфтлик ҳамда иккита яккалик баҳсларида ғолиблар аниқланади. 

Унда Жўрабек Каримов ва Санжар Файзиев жуфтлиги Мишель Саад ҳамда Рой Табет тандеми билан ҳисоб-китоб қилади. Яккаликда эса Бенжамин Ҳассан Санжар Файзиевга, Ҳади Хабиб Ҳумоюн Султоновга қарши кортга чиқади.