Диллиан Уайт ва 20 ёшли иқтидор эгаси Мозес Итаума тарозидан ўтиб олди

Мухлислар оқшом доирасида супероғир вазн тоифасидаги қизиқарли жангга гувоҳ бўлишади. Унда британиялик боксчилар - мағлубият ва муроса нималигини билмай келаётган 20 ёшли "проспект" Мозес Итаума (12-0, 10 KO) тажрибали ватандоши Диллиан Уайт (31-3, 21 КО)га қарши рингга кўтарилади. 

Бугунги жанг олдидан боксчилар расмий тарозидан ўтиш маросими ҳамда сўнгги нигоҳлар тўқнашувида учрашишди. Мозес Итаума тарозида 106,8 килограмм тош босди. Бу унинг фаолиятидаги энг енгил оғирлик ҳисобланади. Шу йилнинг май ойида Майк Бейлоганга қарши ўтказган жангида у ҳозиргидан 9 килограммга оғирроқ эди. 

Диллиан Уайт эса тарозида 110,9 килограмм вазн қайд этди. У ҳам сўнгги жанги билан таққослаганда, 8,6 килограммга енгилроқ чиқди. Уайт ўтган йилнинг декабрь ойида Эбенезер Теттега қарши ўтказган жангида деярли 120 кг вазнга эга эди. Бугун Диллиан фаолиятининг сўнгги 10 йиллигидаги энг енгил вазн билан рингга кўтарилади.