Дилшодбек Рўзметов АҚШдаги промоутерлик компанияси билан шартнома имзолади

24 ёшли чарм қўлқоп устамиз 2021 йилнинг декабрь ойида проф боксда дебют қилган эди. Шундан сўнг у проф рингда 3 та жанг ўтказди ва барчасида ғалаба қозонди.

Ҳаваскор боксда 2019 йилда Екатеринбург (Россия) шаҳрида ташкил этилган жаҳон чемпионатида кумуш медални қўлга киритган, Токио-2022 Олимпиадаси иштирокчиси, 2021 йилда Дубай (БАА)да ўтказилган Осиё чемпионати ғолиби ҳисобланган Дилшодбек Рўзметов машғулотларни АҚШда давом эттирмоқда.

"Fight Game Advisors" компанияси президенти Питер Кан Рўзметов билан келишув эълон қилингач, боксчимиз ҳақида илиқ фикр билдирди:

"Мен Дилшодбек билан унинг профессионал фаолиятига йўл-йўриқ кўрсатиш учун ҳамкорлик қилаётганимни эълон қилишдан жуда мамнунман. 2020 йилги Олимпиадада Ўзбекистон шарафини ҳимоя қилганидан сўнг унинг услуби профессионал даражага мослаштирилганини кўриш мумкин эди. Мен олдинда нималар кутаётганидан ҳаяжондаман".

Ўз ўрнида Дилшодбек Рўзметов ҳам бу келишувдан мамнун эканини яширмади:

"Ўзбекистонда бокс бошқа спорт турларига қараганда кўпроқ ривожланган. Яхши боксчиларнинг барчаси йирик промоутерлар билан шартнома имзолаган. Мен Питер Кан билан шартнома имзоладим ва чин дилдан ишонаманки, мен ўзбекистонликлар орасида катта промоутер билан шартнома имзолаб, жаҳон чемпиони бўлиш илинжидаги навбатдаги боксчиман. Питернинг тажрибаси ва муваффақияти билан мен ўз олдимда катта имкониятлар пайдо бўлишига шубҳа қилмайман," - деди Рўзметов.

Дилшодбек Рўзметов ҳозирда Флорида штатининг Бока-Ратон шаҳрида Артём Кузминов ва Дерик Сантос билан биргаликда машғулот олиб бормоқда.