08 янв 09:49
Янгиликлар

Теннис

Димитров 7 йиллик танаффусдан сўнг илк совринини қўлга киритди

Австралиянинг Брисбен шаҳрида ўтказилган теннис турнири Григор Димитровнинг ғалабаси билан якунланди.

Болгариялик тажрибали теннисчи 2017 йилдан бери илк бор ATP турнири бош совринини қўлга киритди. Рейтингда 14-поғонани эгаллаб келган Димитров ҳал қилувчи финал учрашувида дунёнинг саккизинчи ракеткаси, даниялик Хольгер Рунени мағлуб этишни уддалади - 7/6(5), 6/4.

Теннисчиларнинг ўзаро учрашувларида Григор ҳисобда олдинга чиқиб олди - 2:1. Икки соату 19 дақиқа давом этган финалда Димитров 8, Руне 9 та эйс зарбасини амалга оширди. Қўшхатолар Рунеда биттага кўпроқ бўлди - 2/3. Учрашувдаги ягона брейк Григорга тегишли бўлди.

Brisbane International presented by Evie турниридаги муваффақиятли иштирок Димитровга 250 рейтинг очкоси ҳамда 95,340 доллар мукофот пули келтирди. Бу 32 ёшли болгариялик учун фаолиятидаги тўққизинчи соврин бўлди.