Допинг туфайли ғалабасидан айрилган ва камига четлатилган қозоғистонлик UFC жангчиси баёнот билан чиқди

"Ҳурматли мухлислар, ассалому алайкум! Бир ярим ой олдин сизларни ёрқин ғалабам билан хурсанд қилгандим, аммо нохуш хабар тарқалди — бу жанг ҳисобга олинмайди.

Нега? Ҳозир турли хил маълумотлар тарқаляпти. Хусусан, мени допингда ушлашгани ҳақида гап-сўзлар бор. Гап дорихонада сотиладиган дори — сийдик ҳайдовчи восита ҳақида кетяпти. Жанг ҳафтаси давомида кўп сув ичгандим ва бу дори организмдан суюқликни чиқаришга ёрдам берган. Ростини айтсам, унинг тақиқлангани ҳақида аввалдан билмаганмиз.

Бу оддий дори воситаси, нархи ҳам арзон. Бу — менинг хатом. Шу билан бирга, бу барча биродарларимиз ва бошқа спортчилар учун сабоқ бўлиши керак — дорихоналарда ҳам тақиқланган моддалар кўп. Аммо бу тестостерон, мастерон ёки мельдоний каби тақиқланган препаратлар эмас, бу бошқача ҳолат.

Натижада мени мусобақалардан четлатишди. Яна 10 ой қолди. Умуман олганда, олдимда яна 6 та жанг бор. Бу фақат менинг хатом! Иншааллоҳ, биз яна қайтамиз. барчага раҳмат!", дея вазиятга муносабат билдирган Идирис.