Достон Бозоров: "Мавлонбек учун камарни яна бир марта ҳимоя қилишга тайёрман"

Мусобақа доирасида енгил вазн тоифаси чемпионлиги учун даъвогар бўлиб турган ҳамюртимиз Мавлонбек Миркомилов Туркия вакили Камал Гусейнов билан жанг қилиб, кутилмаганда нокаут орқали мағлуб бўлди.

Вазиятга енгил вазндаги чемпионлик камарини вакант қолдирган ҳамюртимиз Достон Бозоров муносабат билдирди:

"Менда жуда кўп янгиликлар бор. Шунчаки Мавлонбек тасодифий тарзда ютқазиб қўйди, шунинг учун мен ич-ичимдан бошқача ҳис қиляпман ўзимни. Агарда режаларим бироз ортга суриладиган бўлса, исталган вақтда, исталган жойда нуқта қўяман деганман ва нуқта қўяман ҳам яна бир марта. Фақат ҳозир Лига ва мураббийларим ўзаро музокара ўтказишяпти. Худо хоҳласа, агар бу жанг бўлиб қоладиган бўлса, камарни яна бир марта ҳимоя қилиб қўявераман Мавлонбек учун", дейди Бозоров.