Дзюдо. Жакарта ва Буэнос-Айресга тайёргарлик давом этмоқда

Тайёргарликнинг айни босқичида дзюдочиларимизнинг умумий жисмоний тайёргарликларига катта эътибор қаратилмоқда. Бу борада спортчилар режага биноан машғулотлар олиб боришмоқда. Ўсмирлар ва ёшлар терма жамоамиз «Осиё дзюдо маркази»да, катталар эса «Янгиобод» ўқув базасида йиғин ўтказмоқда.

Нуфузли мусобақалар олдидан терма жамоа аъзоларининг кайфияти аъло даражада. Рейтинг мусобақаларида иштирок этаётган ёш полвонларимизда Буэнос-Айресдаги мусобақага лицензия қўлга киритиш учун яхши имконият юзага келган.

Қайд этиб ўтиш лозимки, у ерда дзюдочиларимизнинг жисмоний-тиббий ҳолатига ҳам алоҳида эътибор қаратилмоқда. Терма жамоа шифокори спортчиларнинг организмидаги ўзгаришлар, вазн билан боғлиқ масалаларга алоҳида йўналиш бўйича иш олиб бораяпти. Авваллари фақат массажчи билан ишланган бўлса, эндиликда бу масалага илмий томонлама, алоҳида эътибор билан ёндошилаётгани кишини хурсанд қилди. Бу жиҳат албатта муҳим мусобақалар вақтида ўз таъсирини ўтказиши аниқ.

Терма жамоа мураббийлари спортчиларни тайёрлашда ўзига хос усуллардан фойдаланишмоқда. Машғулотлар кунига икки маҳалдан ўтказилмоқда. Эрталаб спортчилар гилам устида машқ бажаришса, кечки машғулотларда асосан жисмоний ҳолатни кучайтиришга бағишланган машқлар олиб борилмоқда.